三好烏冬：好幼、好滑、好彈牙

近來都幾鍾意去Elements食飯，皆因近柯士甸站，食完飯坐西鐵好快就返到屋企。

其中Elements間稻庭烏冬算係唔錯既選擇。顧名思義，稻庭既主打係烏冬，仲要係同一般食開既粗烏冬唔同，係一種幼烏冬。稻庭提供既烏冬主要分兩大款：湯烏冬同凍烏冬，各式其色。

為食團order左赤豚蕃茄豬骨熱湯烏冬，蕃茄味濃郁，烏冬又滑又彈牙，真係食過番尋味。

除左烏冬外，稻庭另一主打係Shabu Shabu。每次order一定要兩人份量或以上，為食團4個女士只係order左二人份量既海鮮Shabu Shabu。初頭都驚唔夠食，但當鍋物逐一去枱，為食團就有D擔心食唔晒。鍋物除左海鮮外，仲有一大盤唔同種類既菜，單食菜已經夠飽。湯底原來係柚子湯，當D湯滾起時，陣陣柚子香味飄出黎，食落好清新，唔膩。

至於最後兩道菜—雜錦天婦羅同免治雞肉棒都算中規中舉，特別係免治雞肉棒，除左雞肉外，入面仲有粒粒雞軟骨，口感一流。


(稻庭烏冬又爽又滑！)


(免治雞肉棒口感一流。)


(天婦羅中規中舉，無甚驚喜。)

(海鮮同一大盤雜菜。)

(柚子湯底傳出陣陣柚子味，好清新。)