好食兼抵食的小巴黎

小巴黎--並唔係一家法國餐廳，而係主攻越南菜既小餐館。讀書年代已經經常去小巴黎食飯，主要貪其經濟實惠。到出黎做野之後，小巴黎仍然保持一貫的「抵」外，其水準亦係好多越南餐廳不能比擬。

除左招牌菜香茅豬扒飯外，餐牌上每一款菜式都俾到驚喜食客。好似最近為食團去左小巴黎一趟，order左蝦湯檬、馬介休炒通菜、軟殼蟹同扎肉蝦卷，每款菜式實在令人回味無窮，而價錢更加實惠，只係百五蚊有找！

「華星冰室」得個名

90年代中，華星歌手個個紅到發紫，但踏入千禧年後，佢地就謝得好快。華星曾經最紅0個幾個靚仔歌手，而家叫自己做「Big 4」既許志安、梁漢文、蘇永康同張衛健就用左舊唱片公司個名係灣仔開左間茶餐廳「華星冰室」。

(餐牌好簡單。)

挾住佢地四個既名，好多人都慕名而黎，每個lunch time都大排長龍，睇下有冇機會一睹佢地既風采。為食團亦因為見到咁多人排龍，於是就趁一個晚上試一試有幾好食。

「華星冰室」提供既茶餐好簡單，厚多士、火腿炒蛋、沙爹牛意等等，睇落好似同澳洲牛奶公司有得fight，食落竟然係差幾皮，唔怪得一輪貪新鮮同熱情過後，lunch time既長龍已經不復見...

(意粉同通粉好麻麻，厚多士還好。

(最好食既竟然係奶油豬仔包！)

名門Lunch歎私房菜

愈黎愈覺得灣仔好多野食，每日食一間的話，應該可以三幾個月日日唔同餐廳。

「名門」係做私房菜，lunch既價錢較相宜，夜晚就比較貴。今日lunch就去左「名門」，同為食團友一人叫一個菜，分別係「名門秘製骨」同「XO醬炒雜菌」。秘製骨似係用左D梅去炒，好鬆脆好香口；而炒雜菌就好野味，食到令人停唔到口。Lunch set除左一個餸外，仲有一個湯、青菜同甜品。雖然一個set要$85，但間中豪一次亦都值得！

(Lunch set有好多款式，每一道菜看似平平無奇，但食完令人回味無窮！)

江順河鮮嚐河鮮

係香港食河鮮一向都唔及食海鮮普遍，近年來先陸續開多左專食河鮮既酒家。前陣子為食團同朋友補祝生日，專登去「江順河鮮」試下食河鮮同家鄉小菜，味道果然好唔同！


(爽脆魚皮同蓮耦餅。)


(石頭燒蠔及河鮮大冧哥。)


(另一名菜污漕雞及魚腸焗蛋。)

原汁原味食住家飯

為食團每日為左食lunch而頭痛，諗起每日要食多汁飯同味精飯都怕怕。最近路過灣仔道既「原汁原汁」，俾門面既舊古中式裝修吸引住。

「原汁原味」最大特色係用一系列古舊色彩既碗碟，主打既菜色係家庭小菜，令人有另一番風味。



為食貓同為食團友分別食蘿蔔牛腩同香菇肉餅飯，再加一碗西洋菜湯，即時好似返左屋企食lunch，好warm。

令人懷念既雞煨麵

今日係銅鑼灣行街，突然好想食「美味廚」既雞煨麵，於是坐言起行，立即動身去京士頓街。


除左雞煨麵，仲另外叫左牛腩菜飯同酸辣湯。呢個午餐真係令人回味無窮！

Mackie Kitchen心思一流

最近發現左嘉路連山道附近有幾間餐廳環境同食物都唔錯，今次為食團就去左Mackie Kitchen。當銅鑼灣夜晚度度都好難搵位食飯時，Mackie Kitchen就夠靜，任坐唔嬲。雖然食物唔算突出，但係Mackie Kitchen由menu以至結賬用既簿，都係手造，可見心思一流。

Rice Paper歎米紙卷

是日飯餐，係又一城Rice Paper搞掂。



Rice Paper最出名係米紙卷，為食團叫左軟殼蟹米紙卷，好味，正，值得一食再食。

其他係青菜同牛柳飯，不俗...

食北海道牛奶茶餐

今日去左試禮頓道間北海道牧場餐廳，該處以北海道牛奶煮食為賣點，openrice食評就麻麻，但試完後覺得唔錯！



(叉燒湯意。)


(厚多士配牛奶炒蛋。)


(餐肉湯意。)

北海道牧場餐廳提供既菜式好簡單，簡單到好似茶記既茶餐，但價錢又唔係平到茶記咁，反而澳洲牛奶公司算係佢地既direct competitor。

套餐係餐肉叉燒意粉/通粉，再配牛奶炒蛋加多士，唔鍾意炒蛋，就可選擇太陽蛋。意粉既湯唔係一般茶記既湯，係牛奶忌廉湯，入口幾香幾滑。如果當係食茶記，$3X一個餐固然係貴，但北海道牧場餐廳用既料加左D心思，算係食得過。

iSquare Carpaccio新嚐試

為食團近日聚舊，選擇左新開商場iSquare。iSquare有十幾層商場，每層面積好細，不過食肆就好多。為食團貪新鮮揀左專食意大利菜既Carpaccio試一試。

話明食意大利菜，Carpaccio主打係巴馬火腿pizza、鱸魚柳、意大利脆包等等既意大利菜式。為食團揀左鱸魚柳、巴馬火腿pizza同龍蝦扁意粉。

未上菜前，waiter不停推銷其星座飲品，不停要我地嘗試下自己星座同有關星座飲品係咪match，又話可以試下自己星座係咩味，真係好sorry，為食團對呢個噱頭完全冇興趣，因為兩樣野根本風馬牛不相及，聯想唔到星座同味道有乜關係。

勞叨過後，終於上餐包。餐包係一個意大利脆包，未知係咪因為個包唔多夠熱，所以感覺好一般。接著，appetizer鱸魚柳登場，鱸魚柳既薄且滑，魚柳上層仲鋪左d煙三文魚粒，咸淡適中，口感不俗。

主菜分別係龍蝦扁意粉同巴馬火腿pizza。先講龍蝦扁意粉，除左龍蝦肉外，個意粉用左龍蝦汁去煮，鍾意食龍蝦既會覺得唔錯。至於巴馬火腿pizza，pizza好脆，巴馬火腿鋪滿晒整個pizza，材料十足，好好味。

食飽咸點後，就係甜點上場既時候。第一款甜點係chocolate fun，當中包括左chocolate心太軟、chocolate moose同chocolate ice-cream。心太軟入口啖啖香濃朱古力漿，正！但moose就略嫌太濃，濃上加濃，如果可以換上清新既雪芭，營造對比口味就更好。

另一款甜點係青蘋果撻伴雲呢拿雪糕。青蘋果撻餅底鬆脆，再配凍冰冰既雪糕，一冷一熱既組合，十分討好。

整體黎講，Carpaccio食物算唔錯，但服務真係要改善。除左極力推銷飲品外，waiter既愛理不理既態度真係麻麻，加上餐廳面積有限，仲勉強擺放多張枱，枱貼枱，想轉身亦有困難，令人坐得唔多舒服。


(意大利脆包唔夠熱，麻麻地。)


(鱸魚柳口感唔錯。)


(龍蝦汁幾濃，加上幾多龍蝦肉，鍾意食龍蝦既朋友可以一試。)


(巴馬火腿pizza用料十足。)

(心太軟好味，但朱古力moose就不太好。)

(青蘋果撻同雪糕配搭得宜。)

翡翠拉麵小籠包團年飯...麻麻地

今日幾位為食團友去左翡翠拉麵小籠包食團年飯。為食團本來去百伏棧食台灣麵，但由於百伏棧太多人樓面阿姐太混亂，所以最後揀左翡翠拉麵小籠包。

翡翠拉麵小籠包主打係食上海菜，但質素只係一般，特別係健宜醉雞，$7x只得一小盅，實在唔抵食。另外，雞火炒飯也是欠缺味道。最好的還是小籠包，多汁皮薄。

整體而言，每位76個大洋，實在不太划算。

(小籠包係成餐最好食了，上海粗炒只係一般。)

(雞火炒飯冇乜味。)

(醉雞既size簡直係嚇親人，同價錢唔合比例。)

三好烏冬：好幼、好滑、好彈牙

近來都幾鍾意去Elements食飯，皆因近柯士甸站，食完飯坐西鐵好快就返到屋企。

其中Elements間稻庭烏冬算係唔錯既選擇。顧名思義，稻庭既主打係烏冬，仲要係同一般食開既粗烏冬唔同，係一種幼烏冬。稻庭提供既烏冬主要分兩大款：湯烏冬同凍烏冬，各式其色。

為食團order左赤豚蕃茄豬骨熱湯烏冬，蕃茄味濃郁，烏冬又滑又彈牙，真係食過番尋味。

除左烏冬外，稻庭另一主打係Shabu Shabu。每次order一定要兩人份量或以上，為食團4個女士只係order左二人份量既海鮮Shabu Shabu。初頭都驚唔夠食，但當鍋物逐一去枱，為食團就有D擔心食唔晒。鍋物除左海鮮外，仲有一大盤唔同種類既菜，單食菜已經夠飽。湯底原來係柚子湯，當D湯滾起時，陣陣柚子香味飄出黎，食落好清新，唔膩。

至於最後兩道菜—雜錦天婦羅同免治雞肉棒都算中規中舉，特別係免治雞肉棒，除左雞肉外，入面仲有粒粒雞軟骨，口感一流。


(稻庭烏冬又爽又滑！)


(免治雞肉棒口感一流。)


(天婦羅中規中舉，無甚驚喜。)

(海鮮同一大盤雜菜。)

(柚子湯底傳出陣陣柚子味，好清新。)

La Bons Brasserie心太軟一流

較早前朋友生日，所以為食貓同幾個為食團友去左胡忠大廈對面既La Bons Brasserie慶祝。

La Bons Brasserie主要係食意大利同法國菜，環境幾優靜，適合幾個朋友一齊食飯傾計。

Starter就order左鵝肝同焗田螺，main course分別係墨汁意大利飯、炭燒肉眼扒同大蝦意大利粉。味道不俗，但份量對4個人黎講，略嫌唔夠。

其實揀La Bons Brasserie慶祝生日，就係貪佢最出名既朱古力心太軟加雪糕，果然名不虛傳。賣相得相當吸引，熱烘烘的朱古力漿慢慢流出來，不太濃太稀，恰度好處，味道濃郁有滋味，令人滿足。


(兩款Starter不俗。)


(墨汁意大利飯同牛扒的份量太少。)

(最令人滿意既係心太軟。)

終於有扒鋸了！

上次去BLT Steak食唔到steak，今次去Steik World Meats終於有機會了。



Steik World Meats有好多款steak任君選擇，American Rib Eye、Argentina Sirloin、Australian Rib Eye、日本和牛等等。為食團只係揀普通既American Rib Eye，同一個燒帶子starter。

食完starter後，waitress會捧上一系列大大小小既牛扒刀，如果你舉旗不定，唔知揀唔同既刀對食法同口感有乜影響時，waitress會解釋有美國刀、法國刀，女士可選擇較細既牛扒刀，男士可選擇大既刀等等。當奉上main course時，除左兩款牛扒汁外，waitress又會再度出現，show出好多款既芥末，可以任食客選幾款唔同既芥末助食。

基本上食物都唔錯，American Rib Eye好有肉汁，食到有少少牛筋、牛油加扒肉時，口感就更加正。燒帶子就不過不失。

縱觀全餐，食物尚算不俗，但最重要係誠意十足呢！


(多款牛扒刀任你揀。)

(燒帶子，一般啦。)

(12oz American Rib Eye配薯條side dish。)