誠意度十足既甜品Paul Lafayet

經過同事介紹下，今日去左K11既Paul Lafayet食甜品。原來Paul Lafayet舖位細細，只係足夠容納一張L形枱同三張櫈，基本上好多顧客都係takeaway。當然，為食團選擇左買兩件甜品堂食。

為食團分別買左Mille Feuilles (拿破崙)同Choc Raspberry Cake (朱古力紅莓蛋糕)。Mille Feuilles 夾層既吉士好幼滑，最正既係酥皮鬆脆，仲有啖啖牛油味，為食團大力推介！

另一件甜品Choc Raspberry Cake，睇見外層既濃朱古力同頂部既芒果味macaron以為會好膩，但其內涵簡直令人改觀！蛋糕內部係紅莓mousse，入口有D微酸，蛋糕既底層係海棉蛋糕，味道清淡，同外層既濃朱古力形成強烈對比，食完後不會太膩！

為食團見到在座有一對小情人order Crème Brulee。店員即時係燉蛋面塗上一層薄薄既焦糖，然後再用火槍燒一燒焦糖。小情人食完Crème Brulee，仲問店員可唔可以拎走Crème Brulee個杯，店員完全冇托手肘，仲換個全新既Crème Brulee杯俾佢，誠意度十足！

Paul Lafayet唯一美中不足係人手同經驗不足，一個店員又要收錢，又要包裝，如果遇著客人要Crème Brulee，仲要即場係燉蛋面燒一燒焦糖，令客人等得心急呢！


(Choc Raspberry Cake內涵絕對唔膩，同外層既濃朱古力配合得宜！)


(Mille Feuilles 每層酥皮都好鬆脆。)


(如果order Crème Brulee，店員仲會即席燒一燒燉蛋上既焦糖，好新鮮呀！)

科學園半日遊

上周日去左科學園踩單車，順道食埋tea。科學園環境幾好，入面有兩個canteen，一個係比較高級少少，有buffet同cake提供既café，食客可以選擇坐室內，亦可坐係室外舒舒服服咁一邊欣賞優美景色，一邊嘆咖啡。

而單車團則選擇另一個canteen－大家樂，雖則大家一早已經知道大家樂係咩質素，但最好笑既係，乜野食都冇得揀，下午茶時間只係得餐蛋麵之流同螢光汁豬扒飯，至於其他三文治和雞翼等等，免問。

未知平日返工日子情況係咪一樣，否則，係科學園返工，都係帶愛心飯盒好D…

(大家樂個環境都唔錯，但就冇乜選擇提供俾食客...)

魚粥配鯇魚皮 又鮮又爽

今晚好想食粥，一心諗住去「知粥嘗樂」，後來同事介紹，灣仔英皇附近有間叫「靠得住」既粥店，以魚湯滾粥聞名，於是為食團就改地點食魚粥。

「靠得住」出品既粥分海鮮、豬、雞、牛和其他精選，為食團叫左兩個粥，分別係拆肉泥鯭粥同豬潤鱔球粥，另外就叫左個唔係度度有得食既爽脆鯇魚皮。

首先，一如店內貼滿「全店出品 絕不加味精」既標語，兩款粥食落好似唔夠有味精，唔會令人口渴，仲幾有鮮味，可能真係用魚黎淆湯，冇呃人卦。

全餐最令人欣賞既係爽脆鯇魚皮，入口好爽，魚皮仲有陣陣胡椒味，入口唔會鯹，正呀！

除左粥外，其實舖頭仲有魚湯、咸肉粽、粉腸、牛柏葉、花膠等等，但一來兩個粥已經夠飽，更重要係，魚湯同小食既價錢動輒都要50蚊以上，比兩碗粥貴，實在不太划算，所以，還是知足嘗樂吧！


(拆肉泥鯭粥，粥內真係好多泥鯭肉架！)


(豬潤鱔球粥，D豬潤多到滿瀉。)


(爽脆鯇魚皮，魚皮爽，再加上脆花生伴碟，好配搭！)

睇住幻彩詠香江鋸扒

聞說海港城BLT Steak既steak好出名，於是為食貓約左為食團友一齊去鋸扒。

去到BLT Steak，已經俾環境吸引住。由於為食團早到，所以被安排坐窗口位，一邊眺望維多利亞港景色同幻彩詠香江，一邊享受美食，一樂也。

為食團order左龍蝦沙律、羊扒（無錯…只係羊扒，唔係steak。原因係為食團友一早唔講佢唔食得牛囉…所以叫左羊扒，好掃興。）同洋葱圈。 未上appetizer前，waiter已經為每人送上一個比拳頭還要大既包，由於面包中空，加上入口鬆脆，所以唔會太膩。除左可薄薄抹上牛油之外，waiter還推介係包上灑上些海鹽，會更惹味。

輪到龍蝦沙律上場。沙律上鋪滿一片片龍蝦肉，淡淡海水味入口，令沙律更添清新。

接住，主角登場。7成熟既羊架，再配一點點薄荷醬，本以為兩者風馬牛不相及，但事實上係出奇地配合，令羊架入口有即溶感覺。最初認為冇得食steak會好掃興，原來一切都係錯覺！食完羊架後，會令人念念不忘，好想再食！

食完羊架後，side dish既洋葱圈已經變得多餘，厚厚既炸粉令人有點卻步。

最後，order左雪糕同雪芭，香蕉同朱古力雪糕有點似牛奶公司的出品，反而raspberry雪芭有驚喜。

總括黎講，BLT Steak唔錯，每位大約$300都算值得，最大原因係美景配美食呢！


(望落以為個餐包好似豬手咁大，其實內裏中空！)

(一隻龍蝦鉗放係沙律上面，睇到都流晒口水。)

(羊架配薄荷醬，出奇地夾！)

(朱古力同香蕉雪糕好一般。)

深水埗為食團

今日由K11食到深水埗，好似去左台灣咁，食完一間又一間。

第一站 - K11
入左間叫Aropa食tea，order左兩個set。第一個係巴馬火腿水牛芝士包，另一個係麵包布甸朱古力濃汁。


(巴馬火腿水牛芝士包個包好味呀。)

巴馬火腿水牛芝士包最特別係個包，好脆好鬆化；麵包布甸幾軟，幾可口。總括黎講，一般啦。

第二站 - 深水埗
夜晚去深水埗展開瘋狂飲食。

第一站係去左山東餃子館，好多款餃子，有蒸有煎，唔同口感，大伙兒叫左蕃茄鮮肉煎餃同三鮮蒸餃。另order左個麻醬撈麵，好香既麻香，D麵好彈牙。

下一站去傷心酸辣粉，D口水雞好好味，仲有重慶辣皮蛋，皮蛋係透明的，味道同外觀一流。

(口水雞、辣皮蛋同土豆絲都好好味。)

最後，為食團去埋恭和堂食荳花作為今日既總結，荳花暖笠笠滑入口中，一流呀！

新Blog開張

好耐冇寫blog了，原來對上一次寫blog已經係2005既事。